ശത്രുക്കളില്‍നിന്നും നമ്മെ വെറുക്കുന്നവരുടെ കൈയില്‍നിന്നും വിമോചിതരായി, നിര്‍ഭയം പരിശുദ്ധിയിലും നീതിയിലും എപ്പോഴും അവിടുത്തെ മുമ്പില്‍ ശുശ്രൂഷ ചെയ്യാന്‍ വേണ്ട അനുഗ്രഹം (ലൂക്കാ 1:71-75) നാം പ്രാപിക്കണം; ദൈവമക്കള്‍ക്കടുത്ത സ്വാതന്ത്ര്യത്തോടും അവകാശത്തോടുംകൂടെ ദൈവത്തെ ആബാ – പിതാവേ – എന്നു വിളിക്കുവാന്‍ നമുക്കോരോരുത്തര്‍ക്കും സാധിക്കണം. ഈ കാഴ്ചപ്പാടോടുകൂടെയാണ്, പുത്തനായി ആശീര്‍വദിച്ച ഭവനത്തിന് മൗണ്ട് നെബോ ആബാഭവനം എന്നു നാമകരണം ചെയ്തിരിക്കുന്നത്. സ്വന്തം ആലോചനകളെ പിന്തുടര്‍ന്നു കലഹിച്ചു വഴിതെറ്റി (ഏശ 65:2) പിതാവിന്‍റെ ഭവനം വിട്ടുപോയ ധൂര്‍ത്തനായ പുത്രന്‍ അനുതപിച്ചു തിരിച്ചുവന്നപ്പോള്‍ ഓടിച്ചെന്നു കെട്ടിപ്പിടിച്ചു ചുംബിച്ചു സ്വീകരിക്കുന്ന പിതാവാണ് (ലൂക്കാ 15:20) ഈ ആബാഭവനത്തിന്‍റെ ചൈതന്യം. തിരുസഭയിലൂടെ നമുക്കായി തുറക്കപ്പെട്ടിരിക്കുന്ന ആബാ-പിതാവനുഭവത്തിന്‍റെ പശ്ചാത്തലത്തിലാണല്ലോ നാം ആഗോള സഭാതലവനെ പരിശുദ്ധ പിതാവ് എന്നും, രൂപതാദ്ധ്യക്ഷനെ അഭിവന്ദ്യ പിതാവ് എന്നും, വൈദികനെ അച്ചന്‍ എന്നും വിളിക്കുന്നത്.